Phir Us Kay Jatay Hii Yeh Dil SunSaan hO Kar Reh Gya
Acha Bhala Ik Shehar Tha Veraan hO Kar Reh Gya

Har NaQsh Batal hO Gya Ab Kay Dyaar e Hijr Mein
Ik Zakhm gUzray WaQt Ki PehChan hO Kar Reh Gya

rUt Nay Meray CharOn Traf KheenChay Hisaar e Baam o Dar
Yeh Shehar Phir Meray Liye Zandaan hO Kar Reh Gya

kUch Din mUjhey Aawaz Dii lOgon Nay Us Kay Naam Say
Phir Shehar Bhar Mein wO Merii PehChaan hO Kar Reh Gya

Ik Khwaab hO Kar Reh Gaien gUlShan Say Apni NiSbatien
Dil Raiza Raiza KaanCh Ka gUl-Daan hO Kar Reh Gya

Har Sa'at e Aaraam e Dil Har Lamha TaSkeen e jAan
BiChaRay hOye Ik Shakhs Ka Paimaan hO Kar Reh Gya

Khwaahish tO Thii "Sajid" mUjhay TaS-heer e Mehar o Maah Kii
Lekin Fqat Main Saahib e Dewaan hO Kar Reh Gya
2.
Tum Ko To Maloom Hai Sab Kuchh

 tUm Ko tO MalOom hAi Sab Kuch tUm tO Meray hUmSaaye hO
Bail tO Kab Kii SOokh Chukii Ab Kaliyaan dhOondnay Aaye hO


mOm Kay PutlOn Nay Ab Kay Yeh hUmSafrii Kii Shart Rakhii
dhOop Ka Sehra Bhi Kat Jaye Safar Bhi Saaye Saaye hO


Kis Ki Aamad gUlshan gUlshan KhUwbOo Ban Kay Phailii hAi
Aey PhOolo! tUm Tehnii Tehnii Kis Ka Sandaisa Laaye hO


Taro ! tUmhien tO Teh Karnii Thii Meray Saath mUsaafat e Gham
HijR Kii Pehlii Shab hAi Abhi Say dhUndlaaye dhUndlaaye hO


Har DhArkAn Mein tUmhien Utaara Har Sapney Mein tUmhien Pukara
SadiyOn Tak Chaha hAi tUm Ko Lekin Phir Bhi Paraaye hO


Main Nay PalkOn Say Chunay hAin Is DhARtii Kay Mah o NajOom
"Sajid" Meray Baaray Mein Ab jO Bhi Us Kii Raaye hO 
3. 
 muhabbaten mery saath hon

 Yehi aarzoo rahi umr bhar ke muhabbaten mery saath hon
kabhi aesa ishq nahin kiya ke nadaamten mery saath hon

koi aesa harf nahin likha ke ho sharm saar qalm mera
koi aesa jurm nahi kiya ke wazahten mery saathon

faqt aik shakhs ki aarzoo mein guzar rahi hai yeh zindagi
yeh talab nahin k tamaam sheher ki chahten mery saath hon

main kisi adalat-e-ishq main ae mery khuda rahoon surkhuroo
kaf-e-dast par mera dil rahy'meri tohmaten mery saath hon

mujh rasmi sa mel jol pasand hi nahin jan-e-man!
main yeh chahta hoon k jo tu mily meri wehshaten mery saath hon

Yaad nahi kya kya dekha tha sare manzar bhool gaye
us ke galiyon se jab laute apna bhi ghar bhool gaye

khub gaye pardes ki apne divar-o-dar bhool gaye
shish-mahal ne aisa ghera matti ke ghar bhool gaye

tujh ko bhi jab apni qasamen apne wade yaad nahi
hum bhi apne khwab teri aankhon mein rakh kar bhool gaye

mujh ko jinhone qatl kiya hai koi unhen batalaye “nazeer”
meri lash ke pehlu mein wo apna khanjar bhool gaye

apni aankhon ki samundar mein utar jane de
tera mujarim hun mujhe dub ki mar jane de

ae naye dost main samajhunga tujhe bhi apana
pahale mazi ka koi zakhm to bhar jane de

aag duniya ki lagai hui bhuj jayegi
koi aansu mere daman pe bikhar jane de

zakhm kitne teri chahat se mile hain mujhko
sochata hun ki kahun tujhase magar jane de

 

1.
Saath har hichakii ke lab par

Saath har hichakii ke lab par unkaa naam aayaa tou kyaa?
Jo samaj na aayaa vo payaam aayaa tou kyaa?

May se mahruup ab bhi, jo sharike-daur hun.
Paaye saakii se jo thokar khaake jaam aayaa tou kyaa?
2.
Mujh gamjadaa ke paas se sab

Mujh gamjadaa ke paas se sab ro kar uthe hai
Haan, aap ik ese hai ki khoosh hoke uthe hai

Munh uth ke tou sab dhote hai ae deed-e-khumbaaz
Bistar se ham uthe hai tou munh dhoke uthe hai

1.
Josh-e-junun ka ye aalam hai

Dhoom machayen, sabza rounden, phoolon ko pamal karen
Josh-e-junun ka ye aalam hai, ab kya apna haal karen

Jaan se badhkar dil hai pyara, dil se ziyada jaan aziz
Dard-e-mohabbat ka ik tohfa kis-kis ko irsaal karen

Rooh ki ik-ik chot ubharen dil ka ik-ik zakhm dikhayen
Hum se ho to numayan kya-kya apne khdd-o-khal karen

Karz bhalaa kya dega koi, bheekh bhi milni mushkil hai
Nadaron ki is basti mein kis se jake sawaal karen

Har ik dard ko apna janen har ik gham ko apnayeN
Khwah kisi ki daulat-e-gham ho dil ko malamal karen
2.
Beqaraarii Sii Beqaraarii Hai

beqaraarii sii beqaraarii hai
din bhii bhaarii hai raat bhaarii hai

zindagii kii bisaat par aksar
jiitii baazii bhii ham ne haarii hai

[bisaat=game-board]

toRo dil meraa shauq se toRo
chiiz merii nahiin tumhaarii hai

baar-e-hastii uthaa sakaa na koii
ye Gam-e-dil jahaan se bhaarii hai

[baar=weight]

aankh se chhup ke dil mein baithe ho
haaye kaisii ye pardaa-daarii hai
3.
Dost Kya Khoob Wafaon Ka Sila Dete Hain

Dost Kya Khoob Wafaon Ka Sila Dete Hain
Har Naye MoR Par Aik Zakham Naya Dete Hain

Tum Se To Khair GhaRi Bhar Ki Mulaqat Rahi
Log Sadiyon Ki Rafaqat Ko Bhula Dete Hain

Kese Mumkin Hai Kii Dua Bhi Na Ho Aur Dil Bhi Jaly
Chot PaRti Hai To Patthar Bhi Sada Dete Hain

Kon Hota Hai Museebat Mein Kisi Ka Aye Dost
Aag Lagti Hai To Patte Bhi Hawa Dete Hain

Jin Pe Hota Hai Bohat Dil Ko Bhroosa ‘Tabish’
Waqt Parne Pe Wohi Log Dagha Dete Hain

1.
Dekh Lo Khwaab Magar Khwaab Kaa Charchaa Na Karo

dekh lo khwaab magar khvaab kaa charchaa na karo
log jal jaayenge suuraj kii tamannaa na karo

vaqt kaa kyaa hai kisii pal bhii badal sakataa hai
ho sake tum se to tum mujh pe bharosaa na karo

kirchiyaan tuute hue aks kii chubh jaayengii
aur kuchh roz abhii aaiinaa dekhaa na karo

ajanabii lagane lage khud tumhen apanaa hii vajuud
apane din raat ko itanaa bhii akelaa na karo

khvaab bachchon ke khilaunon kii tarah hote hain
khvaab dekhaa na karo khvaab dikhaayaa na karo

be-khayaalii men kabhii ungaliyaan jal jaayengii
raakh guzare hue lamhon kii kuredaa na karo

mom ke rishte hain garmii se pighal jaayenge
dhuup ke shahar men 'Aazer' ye tamaashaa na karo
2.
Baat Nikalegi To Phir Duur Talak Jaayegii

baat nikalegii tou phir duur talak jaayeg_ii
log bevajah udaasii kaa sabab puuchhenge

ye bhii puuchhege ki tum itanii pareshaan kyuun ho
ungaliyaan uthengii sukhe huye baalon kii taraf

ik nazar dekhenge guzare huye saalon kii taraf
chudiyon par bhii kaii tanz kiye jaayenge

kaanpate haathon pe bhii fikre kase jaayenge
log zaalim hain har ik baat kaa taanaa denge

baaton baaton men meraa zikr bhii le aayenge
unakii baaton kaa zaraa saa bhii asar mat lenaa

varnaa chehare ke taasur se samajh jaayenge
chaahe kuchh bhii ho savaalaat na karanaa unase

mere baare men koii baat na karanaa unase
baat nikalegii to phir duur talak jaayegii
3.
Jo Pahle Thaa Vo Ab Manzar Nahin Hai

Jo pahle thaa vo ab manzar nahiin hai
Hamaaraa ghar hamaaraa ghar nahiin hai

(manzar : a vision)

Mere kaaNdhoN pe meraa sar hai lekin
Kisii ke haath meN patthar nahiin hai

Faraat-e-zindagii itnaa samajh le
YahaaN ko’ii Ali Asghar nahiin hai

(Faraat : Euphrates; Ali Asghar : Youngest martyr at the battle of Karbala)

Mahaktii Hain Bahut Yaadon Kii Fasiilen
Hamaaraa zehn ab banjar nahiiN hai

(fasiil : a low wall; zehn : mind; banjar : uninhabited)

Jise dekho use baahar se dekho
Ko’ii bhii zaat ke andar nahiiN hai

(zaat : self, being)

Tumhen ye jang Khud laRnii paRegii
Abaabiilon kaa ab lashkar nahiiN hai

(abaabiil : A kind of small bird)

Simat hii jaayeNge paaNv hamaare
Magar ham kyaa kareN, chaadar nahiiN hai

Tamannaa but-garii kii kyaa ho puurii
Tumhaare shah’r meN “Aazer” nahiiN hai

(but-garii : idol worship)
4.
Daaman-E-Shauq Mein Masle Huye Phuulon Kii Tarah

daaman-e-shauq meN masle hu’e phuulon kii tarah
zindagii hai kisii muflis ke usuulon kii tarah

(daaman : lap; shauq : desire; masle : crushed; phuul : flowers; muflish : destitute; usuul :

principles)

aaj bhii dhuup ke jangal mein hamaare saaye
naachte phirte hain be-fikr baguulon kii tarah

(dhuup : sunshine; be-fikr : carefree; baguule : crane)

vahii Firaun, vahii tannur ke maqtal, vahii daar
ham bhii is daur mein jiite hain rasuuloN kii tarah

(Firaun : The cruel Pharaoh at the time of Moses;  maqtal : slaughter-house; daar : gallows; daur : era; rasuul : prophet)

ko’ii mausam hii na badlaa ke kisii se kahte
hasrateN suukh gayii dil mein babuulon kii tarah

(hasrateN : desires; babuul : acacia)

haadise ham pe jo guzre the kabhii ai “Aazer”
yaad aate hain magar sirf maquuloN kii tarah

(haadise : accidents; maquuloN : like proverbs)
5.
Ghataaon Kii Udaasii Pii Rahaa Huun

Ghataaon kii udaasii pii rahaa huun
Main ek gehraa samandar ban gayaa huun

Terii yaadon ke angaaron ko aksar
Tasavvur ke labon ko chuumtaa huun

(tasavvur : imagination)

Ko_ii pehchaan-ne vaalaa nahiin hai
Bhare baazaar mein tanhaa khaRaa huun

Meraa qad kitnaa uunchaa ho gayaa hai
Falak kii vus’aton ko naaptaa huun

(qad : stature; falak : heaven; vus’at : expansion; naaptaa : measure)

Vo yuun mujhko bhulaanaa chaahte hain
Ke jaise main bhii ko’ii haadisaa huun

(haadisaa : event)

Badalte mausamon kii diary se
Tere baare mein aksar puuchtaa huun

Kisii kii yaad ke patton ko “Aazer”
Havaaon se bachaa kar rakh rahaa huun

(patte : leaves)
 6.
Tanhaaii Kii Galii Mein Havaaon Kaa Shor Thaa

tanhaa_ii kii galii meN havaaoN kaa shor thaa
aaNkhoN meN so rahaa thaa andheraa thakaa hu’aa

(tanhaa’ii : loneliness; galii : lane; thakaa : tired)

barsoN se chal rahaa hai ko’ii mere saath saath
hai kaun kaash us se maiN ek baar puuchtaa

dil meN utar ke bujh gayii yaadoN kii chaaNdnii
aaNkhoN meN intizaar kaa suuraj pighal gayaa

choRhii hai un kii chaah to ab lag rahaa hai yuuN
jaise maiN itne roz andheroN meN qaid thaa

(roz : days; qaid : confinement, bondage)

maiN ne zaraa sii baat kahii thii mazaaq meN
tumne zaraa sii baat ko itnaa baRhaa liyaa

kamre meN phailtaa rahaa cigarette kaa dhuuaaN
maiN band khiRkiyoN kii taraf dekhtaa rahaa

“Aazer” ye kis kii simt baRhe jaa rahe haiN log
is shah’r meN to mere sivaa ko’ii bhii na thaa

(simt : towards)

1.
Masti Bharii Nazar Ka

mastii bharii nazar kaa nashaa hai mujhe abhii
ye jaam duur rakh do pii lunga phir kabhii

Mastii: Intoxication, Lust
Nashaa: Addiction, Arrogance, Intoxication, Pride

dil ko jalaa ke bazm ko raushan na kiijiye
us mahjabin ko aane men kuchh der hai abhii

Bazm: Assembly, Gathering, Party
Jabiin: Brow, Forehead
Mah-jabiin: One with a face like the moon

ham ne to ashk pii ke guzaarii hai saarii umr
ham se Khafaa hai kis liye aakhir ye zindagii

Ashk: Tears
Khafaa: Angry, Annoyed, Concealment, Displeased, Secrecy

jaam-e-subuu ko duur hii rahane de saaqiiyaa
mujh ko utaaranaa hai kal kaa nashaa abhii

Subuu: Jar, Tumbler
Jaam-e-Subuu: wine cup and wine jug
Utaarnaa: Lessen, Take Down, Take Off, Unload
2.
Ye Kaisii Muhabbat Kahaan Ke Fasaane

ye kaisii muhabbat kahaan ke fasaane
ye piine pilaane ke sab hain bahaane

vo daaman ho un kaa ke sunsaan seharaa
bas ham ko to aakhir hain aansuu bahaane

ye kis ne mujhe mast nazaron se dekhaa
lage khud-ba-khud hii qadam ladakhadaane

chalo tum bhii ‘gumnaam’ ab maikade men
tumhen dafn karane hain kaii gam puraane
3.
Zindagi ek kiraye ka ghar hai

Zindagi ek kiraye ka ghar hai ek na ek din badalana padega
maut jab hum ko aavaz degi ghar se bahar nikalana padega

dher matti ka har aadmi hai bad marane ke hona yahi hai
ya zaminon mein turbat banenge ya chitaon pe jalana padega

raat ke bad hoga savera dekhana hai agar tum ko din sunehara
paon phoolon pe rakhane se pahale tum ko kanton pe chalana padega

aitabar un ke vadon ka mar kar warna ae dil mere zindagi bhar
tujh ko bhi mombatti ke tarah qatara qatara pighalana padega

ye javani hai pal bhar ka sapana dhund le koi mahbub apna
ye javani agar dhal gai to umr bhar hath malana padega
4.
Kanton kii chubhan pai phoolon ka maza bhi

Kanton kii chubhan pai phoolon ka maza bhi
dil dard ke mausam mein roya bhi hansa bhi

aane ka sabab yaad na jane ke khabar hai
wo dil mein raha aur use tod gaya bhi

har ek se manzil ka pata puch raha hai
gumrah mere sath hua rahnuma bhi

‘gumnam’ kabhi apanon se jo gham huye hasil
kuch yaad rahe un mein kuch bhool gaya bhi
5.
Nazar Se Nazar Ko Salaam

nazar se nazar ko salaam aa rahe hain
phir un kii taraf se payaam aa rahe hain

Payaam: Message

jo pardah-nashiin they bahut muddaton se
woh lamhe mujhe bazm-e-aam aa rahe hain

Pardah-nasheen: One who stays veiled
Muddat:  Length Of Time, Period Of Time
Lamhe: Minutes, Moments

sajaane ko ab mere khwaabon ki bastii
ye phoolon ke gajre tamaam aa rahe hain

Gajra: Wreath
Tamaam: All, Complete, End, Entire, Finish, Perfect, Total, Whole

zara toh karo sabr aye maikashon tum
tumharii hi jaanib ye jaam aa rahe hain

Sabr: Patience
Mai-kashon: Drinkers
Jaanib: Towards, In The Direction Of

kahan kho gaye aap ‘Gumnaam’ ho kar
tumhe dhoondhne subah-o-shaam aa rahe hain

 

1.
Labon pe phuul khilte hain

labon pe phuul khilte hain kisi ke naam se pehle
dilon ke diip jalte hain chiraagh-e shaam se pehle

kabhi manzar badalne par bhi qissa chal nahiin paata
kahaani khatam hoti hai kabhi anjaam se pehle

yahi taare tumhaari aankh ki chilman mein rehte the
yahi suuraj nikalta tha tumhaare baam se pehle

diloN ki jagmagaati bastiyon pe raaj karte hain
yahi jo log lagte hain nihaayat aam se pehle

hui hai shaam jungle mein parinde lautte honge
ab in ko kis tarah roken navah-e-daam se pehle

ya saare rang murda the tumhaari shakl ban_ne tak
ya saare harf mohmal the tumhaare naam se pehle

hua hai voh agar munsif to Amjad ehtiyaatan ham
saza tasliim karte hain kisi ilzaam se pehle
2.
Aaj yun muskuraa ke aaye ho

Aaj yun muskuraa ke aaye ho
Jese sab kuch bhulaa ke aaye ho

Yeh nishani hai dil ke lagne ki
Yeh jo tum aaj jaa ke aaye ho

Bhool kar bhi jis tarah koi aaye
Sheher mein yu’n wafaa ke aaye ho

Kyon jhapakti nahin meri ankhain
Chandni main nahaa ke aaye ho

Dil samandar mein chaand sa utra
Kesi khushbu laga ke aaye ho

Subah ki avleen kiran ki tarah
Raat saari jagaa ke aye ho

Kya bahana bana ke jana hai
Kya bahana bana ke aaye ho

Koi jhonkey se kis tarah pooche
Kitni shamain bhujaa ke aaye ho

Aagaye ho to aao, Bismillah
Der lekin lagaa ke aaye ho

Be’kali is qadar kyon Amjad
Kya kahin kuch ganwaa ke aaye ho
3.
Koii Mausam Ho

Koi Mausam Ho, Dil Mein Hai Tumhaari Yaad Ka Mausam
Ke Badla Hee Nahee Jaanan Tumharay Baad Ka Mausam

Nahee Tou Aazma Ke Dekh Lo, Kaisay Badalta Hai ?
Tumhaaray Muskaraanay Se Dil-e-Nashaad Ka Mausam

Kaheen Se Os Haseen Awaaz Ki Khusbuu Pukaaray Gi
Tou Is Ke Saath Badlay Ga Dil-e-Barbaad Ka Mausam

Qafas Ke Baam-o-Dar Mein Roshni Si Aayi Jaati Hai
Chaman Mein Aagaya Shayad Lab-e-Aazaad Ka Mausam

Mere Sheher-e-Pareshaan Mein Teri Be-Chaand Raaton Mein
Bohat Hee Yaad Karta Hun Teri Bunyaad Ka Mausam

Na Koi Gham Khizaan Ka Hai, Na Khwaahish Hai Bahaaron Ki
Hamaaray Saath Hai “Amjad” Kisi Ki Yaad Ka Mausam
4.
Jab bhi ik shaam yaad aati hai

Jab bhi ik shaam yaad aati hai
Jese duniya theher si jati hai

Ik taraf dil hain, Ik taraf duniya
Aur yeh scene kayenaati hai

Yu’n bhi hota hai sher, baaz aukat
Jese bijli si koond jati hai

Maut se ham’kalaam hone ke
Zindagi raste dikhati hai

Haar hoti hai aarzi, us ko
Be-dili mustakil banati hai

Haadsey aik pal nahin rukte
Zindagi hai ke chalti jati hai

Us ke dam se hain ronaq’en sari
Yeh jo dunya ki be-sabaati hai

Baat koi samajh nahin aati
Baat itni samajh mein aati hai
5.
Kya kya hamare khawaab they

Kya kya hamare khawaab they, jane kahan pe kho gaye
Tum bhi kisi ke sath ho, Hum bhi kisi ke ho gaye

Jane woh kyon they, Kaun they? aaye they kis liye yahan
Woh jo fashaar-e-waqt mein, Bojh sa aik ddho gaye

Us ki nazar ne yoon kiya gard-e-malal-e-jaan ko saaf
Abar baras ke jis tarah, Saarey chaman ko dho gaye

Katne se aur barhti hai uthey huye sarun ki fassal
Apne lahu se ahl-e-dil, Beej yeh kese bo gaye

Jin ke bagher ik pal, Jeena bhi muhaal tha
Shaklain bhi un ki bujh gayin, Naam bi un ke kho gaye

Ankhon mein bhar ke rut jage, Raston ko de ke duriyan
Amjad woh apne hamsafar, Kese mazey se so gaye
6.
Hum nahin kehte

Hum nahin kehte hamari, teri dunya ho jaye
Itne rangon mein koi rang to apna ho jaye

Ishq woh “turfa-balaa” hai ke kare jis ki talb,
Us ko maloom na ho, Sheher mein charcha ho jaye

Do sitaron ko jo dekhoon teri ankhen ban jayen
Chand ko dheyan mein laaon tera chehra ho jaye

Har dora hai yeh nigehbaan khari hai kismat
Kese mumkin hai ke har shasks ka socha, ho jaye

Hum ko har bazm mein, Har haal mein sach kehna hai
Sheher ka sheher khafaa hota hai, Acha ho jaye

Ishq woh kaar-e-musalsal hai nahin jis ki akheer
Us ki taufiq hai jis shakhs se jitna ho jaye

Husn ki ankh woh tahsees talb hai amjad
Bheerr ho charon taraf aur koi tanha ho jaye
7.
Chalegi yeh pareshaani kahan tak

Chalegii yeh pareshaani kahan tak
Bata aye ghar ki veerani kahan tak

Bohat lambi thi ab ke, khushk’saali
Barastaa ankh se paani kahan tak

Tere tootey huye gajron ke hote
Mehekti raat ki raani kahan tak

Rukey gi kab talak saanson mein khushbu
Urrey ga rang yeh dhaani kahan tak

Khilona hai isey to tootna hai
Karain dil ki nigehbaani kahan tak

Usey baadal bulate hain hamesha
Samandar main rahe paani kahan tak
Meaning:
 khushk’saali = lack of water, nigehbaani = look after
 8.
Hasti ka aitbaar kiye bagair

Hasti ka aitbaar kiye bagair reh na jaye
Dunya hai yahan per jiye bin raha na jaye

Kat’ti nahin yeh zindagi umeed ke bagher
Yeh jaam woh hai jis ko piye bin raha na jaye

Chahat ka zakhm dil ko tamasha na bana de
Aesa hai chaak jis ko siye bin rahaa na jaye

Dunya ke is afshaar mein hai us ki yaad yoon
Aandhi ho tez aur diye bin raha na jaye

Ik simt tera hukam hai, ik simt kayenaat
Yeh bojh apne sir pe liye bin raha na jaye
9.
Dil ke dariya ko kisi roz

Dil ke dariya ko kisi roz utar jana hai
Itna besimt na chal laut ke ghar jana hai

Us tak ati hai to har chiz thahar jati hai
Jaise pana hi use asl main mar jana hai

Bol ai sham-e-safar rang-e-rihai kya hai
Dil ko rukana hai k taron main thahar jana hai

Kaun ubharate hue mahatab ka rasta roke
Us ko har taur su-e-dasht-e-sahar jana hai

Main khila hun to isi khak main milna hai mujhe
Vo to khushbu hai use agle nagar jana hai

Vo tere husn ka jadu ho k mera gam-e-dil
Har musafir ko isi ghat utar jana hai

Meaning:
Besimt=No Direction, Mahatab=Moon, Ubharte=Rising, Ghat Utar=Go Through
10.
 Guzre hain tere baad bhi

guzre hain tere baad bhi kuchh log idhar se
lekin tirri khushboo na gayi raahguzar se

kyun duubti bhujti hui aankhon mein hai raushan
raatoN ko shikaayat hai to itni hai sahar se

larza tha badan us ka mire haath se chhuu kar
dekha tha mujhe us ne ajab mast nazar se

kya thaan ke nikla tha kahaan aa ke paRa hai
puuchhe to koi is dil-e-sharminda safar se

aaya hai bahut der meN voh shakhs par us ko
jazbaat ki is bhiiR meN  dekhuun maiN kidhar se

ham rizq-e-guzargaah to Khashaak the lekin
voh log jo nikle the hava dekh ke ghar se

aisa to nahiiN, meri tarah sarv-e-lab-e-juu
qadamon pe khaRaa ho kisi uftaad ke Dar se

din the k hamen shahr-e-badan tak ki Khabar thi
aur ab nahiiN aaghah tere khair Khabar se

Amjad na qadam rok k voh duur ki manzil
nikle gi kisi roz isii gard-e-safar se